Гісторыя будынка галоўнага корпуса музея пачалася ў 1957 годзе… Мы ведаем пра яго пераўтварэнні і трансфармацыі за 69 гадоў існавання, але як будзе выглядаць музейная прастора ў будучыні?
Ужо праз некалькі гадоў будынак Мастацкага музея ператворыцца ў музейны квартал у цэнтры горада Мінска. За маштабнай рэканструкцыяй адбудуцца змены і навацыі.
Найбагацейшая калекцыя твораў мастацтва ў Рэспубліцы Беларусь зараз атрымае больш агляду за кошт павелічэння выставачнай прасторы. Наведвальнікаў чакаюць новыя пастаянныя экспазіцыі: “Традыцыйнае народнае мастацтва Беларусі”, “Рускі абраз”, “Злепкі”; у новыя залы пераедзе заходнееўрапейскае мастацтва і экспазіцыя краін Усходу. Новыя плошчы з’явяцца не толькі для прадметаў, якія экспануюцца, але і для тых, што знаходзяцца ў фондасховішчы і памяшканні архіва.
Лекцыйная зала і шматфункцыянальная прастора для музейна-адукацыйных заняткаў дазволяць дзецям і дарослым з камфортам займацца творчасцю, а скульптурны дворык стане прыемным месцам для адпачынку і вольнага часу.
Музей павялічваецца ў маштабах і ператвараецца ў сучасны культурны і турыстычны цэнтр сталіцы.
