1974 год стаў знакавым для музея: загад міністра культуры БССР №178 ад 7 кастрычніка 1974 г. “ Аб рэканструкцыі былога культавага будынка ў вёсцы Раўбічы для размяшчэння ў ім музея народнай творчасці” пачаў музейны летапіс.
Ініцыятыва па ўратаванні рэшткаў помніка ІІ паловы ХІХ ст. і прыстасаванні яго пад музей належала супрацоўніцам Дзяржаўнага мастацкага музея БССР – намесніку дырэктара па навуцы І. М. Паньшынай і старшаму навуковаму супрацоўніку аддзела прыкладнога мастацтва Т. І. Сцёпінай. Каб вырашыць далейшы лёс будучага музея спатрэбілася дапамога дырэктара Дзяржаўнага мастацкага музея БССР – Алены Васільеўны Аладавай: яна ўзначаліла дэлегацыю да Пятра Міронавіча Машэрава, які даў згоду на ўсе далейшыя мерапрыемствы па рэстаўрацыйным работам.
З 12 снежня 1977 г. дырэктарам Дзяржаўнага мастацкага музея БССР прызначаны Юрый Аляксандравіч Карачун, які пераняў эстафету ў справе стварэння будучага філіяла. Яшчэ да завяршэння работ выйшаў загад Міністэрства культуры БССР №97 ад 14 красавіка 1977 г. “Аб стварэнні філіяла Дзяржаўнага мастацкага музея БССР”.
За перыяд з 1979 па 1990 гг. было праведзена звыш 20 экспедыцыйных выездаў, набыта звыш 1000 экспанатаў.
Першая загадчыца музея – Таццяна Іванаўна Сцёпіна. Унеслі вялікі ўклад у развіццё і першыя супрацоўнікі музея, якія стаялі ля вытокаў яго стварэння – Валянціна Рыгораўна Пісарэнка і Алена Уладзіміраўна Сянькевіч.
За ўвесь час работы музея было праведзена безліч мерапрыемстваў – канцэрты, лекцыі, інтэрактыўныя экскурсіі, музейныя праграмы. З’явіліся майстар-класы і лялечны тэатр “Батлейка”. У выставачнай зале за 45 гадоў прайшло каля 200 часовых выстаў з фондаў Нацыянальнага мастацкага музея Рэспублікі Беларусь, замежных і айчынных музеяў, персанальных выстаў.
На выставе будуць прадстаўлены архіўныя фотаздымкі, прадметы з фондаў Нацыянальнага мастацкага музея Рэспублікі Беларусь – самыя цікавыя і незвычайныя, самыя першыя і апошнія паступленні ў калекцыю прыкладнога народнага мастацтва з 1960 па 2024-я гг. На сённяшні час гэта калекцыя налічвае амаль тры тысячы адзінак захавання.
Выстава будзе экспанавацца да 2 сакавіка 2025 года.
Куратар выставы – Андрыевіч Таццяна Яўгенаўна, навуковы супрацоўнік філіяла Нацыянальнага мастацкага музея Рэспублікі Беларусь “Музей беларускага народнага мастацтва”.
