7 сакавіка 2023 года ў музеі “Дом Ваньковічаў. Культура і мастацтва першай паловы XIX ст.” адкрыецца выстава твораў мастакоў ХІХ – пачатку ХХ ст. “Жаночыя вобразы” з фондаў Нацыянальнага мастацкага музея Рэспублікі Беларусь.
Ва ўсе часы вобраз жанчыны натхняў творцаў. Маці, каханая, дачка, незнаёмка – усе яны станавіліся гераінямі жывапісных твораў яшчэ з часоў старажытнасці. І ў кожную эпоху сімвал жаночай прыгажосці знаходзіў сваё ўвасабленне. Найбольш яскрава ён раскрыўся ў XIX стагоддзі.
Мастакі гэтай эпохі надавалі вялікую ўвагу ўнутранаму свету жанчыны, паказвалі яе ў розных амплуа, раскрывалі інтымныя моманты побыту.
На адных партрэтах – яна меланхалічная, задуменная, загадкавая. На іншых – дае магчымасць разгледзець усю глыбіню і своеасаблівасць сваёй жаночай натуры.
Разнастайнасць жаночых вобразаў прадстаўлена на выставе з фондаў Нацыянальнага мастацкага музея Рэспублікі Беларусь.
